Mihemed Se'îdî Kanîmaranî Tenya şahîdî Zîndùy Peymanî Sê Sinûr

Mihemed Se'îdî Kanîmaranî

Le 25-i Novemberî salî rabirdû(2008) le wêbinûsî ruwange da babetêkim sebaret be " Laperrey 10,Rastî Peymanî Sê Sinûr" bilaw kirdewe u ewe buwe hoy pêwendî le gell berêz Yosifî Kanî Maranî.Le sayey xo mandûkirdinî berêzyan u têkoşanî rêzdar Hejar Kanî Maranî birazay,kak Mihemed Se'îd Kanîmaranî,egerçî wez'î sillametîşî baş niye gewreyî kird, wêneyek u bîrewerî xoy sebaret bew " Peyman "e bo nardim ke le wêbinûsî ruwange da be şanaziyewe billaw kirawnetewe.Pêwîste cexit bikirêtewe em nûsraweyey berêz Mihemed Se'îdî Kanîmaranî be giştî akam lêderxstekanî lêkollînewey "Laperrey 10 " piştrast dekenewe.Bo xwêndinewey laperrey 10 biçuwe em nêwnîşane

http://ruwange.blogspot.com/2008/11/10.html

Bîsmîlay Elrehman Elrehîm

(Peymanî Sê Sinûr)

Le 5/7/1944 le ser dawa kirdinî berêzan cenabî xalim şêx 'Ubîdallahî Zînwê u duktur 'Ezîz şemzînî çûme dêy (zînwê). Ew demî temenim hevde sall bû be pêy nasnamey 'êraqî we le polî çuwaremî amadeyî bûm. Hawînan le dêy (Mawetan) debûm ke dekewête nîzêk dêy (Hacî Omeran).Le Zînwê nameyekyan damê ke bîgeyenme dest endamanî Komelley Jêkaf (j.k.) le Sablaxê (Mehabad),we gutyan êmeş lêrewe deçîne dêy (Dize) le (Mergewerr)ê.
Le 8/7/ 1944 be suwarî wulax berew Sablax kewtime rê degell piyawêkî rênas.Bo şew geyiştîne çaxaney (Kanî Bax). Bo beyanî le 9/7/1944 geyiştme Sablax.Lewê çûme kin berêzan 'Ebdulrehman Zebîhî u Sedîq Heyderî u Dillşad Resullî,ke pêşdanîş demnasîn,we namekem be dest geyandin.
Le 11/7/ 1944 Komelley (j.k.) kobûneweyekî gewreyan rêkxist emnîş têyda beşdar bûm,namekeyan xwêndewe u derkewit ke komelley (Hîwa) le komelley (j.k.)- î dawa kirdibû ke peymanek bibestin le nêwan her duk la bo yarmetîdanî yekdî le hemû barêkewe.Lew kobûneweye berêzan Qasimî Qadirî]Qazî[ u 'Ebdulrehman Zebîhî u 'Ebdulrehman Hejar Mukiryanî hellbijêrdiran degell min biçîn bo (Dizê) be serokayetî xuwalêxoşbû Qasimî Qadrî bo guftugo kirdin degell endamanî partî (Hîwa).Heman roj bo êwarê şehîdî gewrey Kurd Pêşewa (Qazî Mihemed) bangêştinî kirdîn bo nanxwardin.
Le 14/7/1944 her çuwarman berew (Mergewerr) kewtîne rê. şew le dêy (Qasimlù) ke dekewîte bin çiyaî (Dimdim) maynewe. le 15/7/1944 paş mandubûnekî zor be wulax u be pêyan geyiştîne dêy (Girdewan) le (Mergewerr)ê. Take biray berêz dktur 'Ezîz, berêz Seyd 'Ebdulqadir lewê bû. Bê ewey xoman aşkira bikeyn
hewallî geyiştinmanim nard bo xallim le (Dizê). Bo êwarê, xallim u duktor 'Ezîz hatin degell çend suwarêkî dîş bo pêşwazîn. Emeş degell wan çuyne (Dizê).Berêz Seyd 'Ebdullah şemzînî babî duktur 'Ezîz mabû le dêyî (Dizê )dadenîşt.
Le 17/7/ 1944 le binarî çiyay ( Dallan Perr) paş guftugoyekî zor le nêwan Komelley (Hîwa) u Komelley (J.K.) peymanêk bestira be nêwî (Peymanî Sê Sinûr) çunke dêy (Dizê) u çiyay (Dallan Perr) dekewne nîzêk sê parçe le parçe dabeşkirawekanî nîştîmanekeman. Ew peymaneş be çend nusxeyek nûsra.Her layek nusxey xoy wergirt.We emin lew şeş kese ziyatir kesî dîm nedît beşdarbît le guftugoyeke.
Le 18/7/ 1944 emin degell nêrdirawanî (J.K.) dêy (Dizê)n be cê hêşt bo şew çuyne şinoyê. Le 19/7/ 1944 geyiştîne (Nexede) u (Sablax).Paş çend roj manewem le (Sablax),le 29/7/1944 (Sablax)im becê hêşt. şew le (Nexede) bûm. Le 30/7 / 1944 geyiştme gellî (Namsîn). Le 31/7/ 1944 geyştime dêy (Peswê). Le 1/8/ 1944 geyştimewe dêyekey xom (Mawetan). le 3/8/ 1944 xallim u Seyd 'Ezîzîş gerranewe (Zînwê).

Imza
Mihemed Se'îd 'Elî Yùsif Kanî Maranî
Hewlêr 1 / 1 / 2009